Reëngevoede veerkragtigheid. Waterbestuur. Bewaring van die natuur. Onderskeidende wyne.
Dit is die hoekstene van die nuutgestigte Dry-Farmed Collective, ‘n bedryfsgeleide inisiatief wat formeel op die wêreldverhoog bekendgestel is by ProWein Düsseldorf gedurende Maart 2026.
Geïnisieer deur Perdeberg Wines, bring dit produsente, navorsers en voorstanders bymekaar wat daartoe verbind is om Suid-Afrika se droëland wingerde te beskerm en te bevorder.
Namate waterskaarste toeneem en klimaatswisselvalligheid landbourealiteite in die Wes-Kaap herskik, het droëlandboerdery (die verbouing van wingerdstokke sonder besproeiing en die uitsluitlike staatmaak op natuurlike seisoenale reënval) na vore gekom as beide ‘n erfenispraktyk en ‘n klimaatslim oplossing.
Volgens die SA Wynbedryfinligting en -stelsels (SAWIS) het Suid-Afrika tans 10 760 hektaar droëlandwingerde, wat 12% van die nasionale wingerdoppervlakte verteenwoordig. Hierdie wingerde word erken vir die produksie van wyne van konsentrasie, struktuur en egtheid, met kleiner korrels en laer opbrengste wat bydra tot diepte van geur en ‘n besondere gevoel van plek.
“Ons het 80 jaar se wynmaakervaring in droëlandwingerdbou,” sê Gerhard van der Watt, uitvoerende hoof van Perdeberg Wines. “Oor dekades het ons konsekwent die uitsonderlike gehalte gesien wat kom van lae-opbrengswingerde met kleiner bessies en gekonsentreerde vrugte. Daar is geen plaasvervanger vir die rou materiaal wat droëlandwingerde produseer nie.”
“Die bewaring van hierdie omgewingsverantwoordelike wingerde in ‘n hoogs mededingende kommersiële omgewing bly egter ‘n uitdaging. Die Dry-Farmed Collective is gestig om te verseker dat ons goeie omgewingspraktyke met kommersiële lewensvatbaarheid kombineer. Die ondersteuning van bedryfsliggame en vroeë aanvaarders oor die hele spektrum bevestig dat dit ‘n inisiatief is wat die breër bedryf kan en moet omarm.”
Vroeë ondersteuners sluit in Perdeberg Wines, Diemersdal , Piekenierskloof Wine, David & Nadia Wines, De Kleine Wyn Koöp en Leeuwenkuil Familiewingerde; ‘n weerspieëling van sterk bedryfsverbintenis tot die beskerming en versterking van Suid-Afrika se droëlandwingerdvoetspoor.
Met wingerdoppervlakte onder druk, het samewerking noodsaaklik geword. Deur onder een vaandel te verenig, poog lede om landbou-erfenis te beskerm terwyl langtermyn omgewings- en ekonomiese volhoubaarheid verseker word.
Baie droëlandwingerde in Suid-Afrika is meer as 20 jaar oud en verteenwoordig onskatbare landbou-erfenis. Namate hierdie wingerde volwasse word, kan produsente kwalifiseer vir Gesertifiseerde Erfeniswingerdstatus onder die Old Vines Project, wat hul nalatenskap verder erken en beskerm.
In sy kern poog die Dry-Farmed Collective om reëngevoede wingerdbou te posisioneer as ‘n bepalende kenmerk van Suid-Afrikaanse wyn, ‘n model van veerkragtigheid wat volgehou word deur bekwame produsente en wingerdspanne wat in harmonie met die natuur werk.
Benewens bewaring, is die inisiatief daarop gemik om rentmeesterskap in meetbare aksie te omskep: die beskerming van skaars waterbronne, die bevordering van kenmerkende wynstyle en die versterking van die langtermyn lewensvatbaarheid van droëlandproduksie.
Kwekers, produsente, handelsvennote en voorstanders word genooi om deel te word van hierdie samewerkingsplatform wat toegewy is aan die beskerming van Suid-Afrika se watertoekoms en die bevordering van kenmerkende, reëngevoede wyne.
E-pos: info@dryfarmedcollective.com | Sosiale media: @dryfarmedcollective
Teks & Foto’s: Dry-Farmed Collective
