‘n Langdurige debat oor die evolusionêre oorsprong van die wêreld se mees gekweekte “magic mushroon” – Psilocybe cubensis – is moontlik nou deur wetenskaplikes van Suider-Afrika en die Verenigde State beëindig.
In ‘n artikel wat in die tydskrif ‘Proceedings B of the Royal Society’ gepubliseer is, beskryf hulle die ontdekking van ‘n nuwe spesie psigedeliese sampioen – Psilocybe ochraceocentrata – in die grasvelde van Suid-Afrika en Zimbabwe. So genoem vanweë die okergeel kleur in die middel van die sampioenhoed, het P. ochraceocentrata ongeveer 1,5 miljoen jaar gelede laas ‘n gemeenskaplike voorouer met P. cubensis gedeel.
Dit is teenstrydig met die heersende siening dat P. cubensis onbedoeld in die Amerikas ingevoer is toe beeste in die 1500’s vanuit Afrika en Europa na die kontinente ingevoer is. P. cubensis is die eerste keer in 1906 in Kuba beskryf.
Breyten van der Merwe, ‘n mikoloog en PhD-student in chemiese ingenieurswese aan die Universiteit Stellenbosch, sê alhoewel die twee spesies soortgelyk lyk, het hulle verskillende genetiese, ekologiese en chemiese eienskappe. Hy is een van die mede-outeurs van die artikel.
Hy sê die bevindinge werp nuwe lig op die natuurlike oorsprong van makgemaakte P. cubensis en verskaf nuwe genetiese hulpbronne vir navorsing oor psigedeliese sampioene.
P. ochraceocentrata word al jare lank wêreldwyd gekweek onder die naam “NSS” (wat staan vir “Natal super strength”) of “Transkei”: “Dit is een van die gewildste soorte psigedeliese sampioene, want dit is redelik kragtig en maklik om te kweek. Maar tot hierdie studie het niemand besef dat dit ‘n heeltemal aparte spesie van die klassieke psigedeliese sampioen is nie,” verduidelik hy.
In samewerking met dr. Alexander Bradshaw van Clark Universiteit, prof. Bryn Dentinger van die Universiteit van Utah Gesondheid in die VSA, dr. Keaton Tremble van die Duke Universiteit, en dr. Cathy Sharp van die Natuurhistoriese Museum van Zimbabwe, het hulle DNS wat uit versamelings regoor Suider-Afrika en historiese tipe-monsters onttrek is, gebruik om multi-lokus filogenetiese ontledings, molekulêre klokdatering en ekologiese nismodellering uit te voer.
Dr. Sharp het in 2013 van die eerste eksemplare van P. ochraceocentrata in Zimbabwe gevind. Tot op hede bly Afrika egter steeds erg onder ondersoek vir swamdiversiteit.
In die artikel, getiteld “Ontdekking van die naaste vrylewende familielid van die makgemaakte psigedeliese sampioen Psilocybe cubensis in Afrika”, stel die span verskeie moontlike scenario’s voor vir wanneer en hoe die spesies soveel miljoene jare gelede uiteengeloop het. Rondom hierdie tyd het grasvelde in Suid-Amerika gediversifiseer, en weidende herbivore, wat voedsel vir hierdie sampioene verskaf om op te groei, het uit Afrika en na Eurasië versprei. Daar word gespekuleer dat hierdie ekologiese veranderinge nisse oopgemaak het vir die afsonderlike spesiasie van P. cubensis en P. ochraceocentrata.
Intussen doen Van der Merwe verdere navorsing oor Psilocybe- sampioene en plaaslike psigoaktiewe plante: “Ons beplan om die verskillende verbindings wat hierdie plante en sampioene produseer, te karakteriseer en te isoleer, en dit dan te toets teen modelle vir posttraumatiese stresversteuring, angs en depressie.”
Teks: Redaksie | Foto’s: Talan Moult
Onderskrif
‘n Nuut beskrewe Afrika-spesie in die psigedeliese sampioenfamilie bevestig sy evolusionêre oorsprong. Psilocybe ochraceocentrata word aangetref op beesmis in die grasvelde van Suider-Afrika.
