Helderblou lug, uitgestrekte oop vlaktes en dolerietrante. Goeie boeke, aangename geselskap en uitstekende wyn. Mildelike ryp, ysige nagte en bytende winde. Geen televisies, geen selfoonontvangs en knus akkommodasie. Die komponente van ‘n perfekte wintervakansie is almal daar, veral as jou viervoetige beste vriend ook genooi word!
As jy van die daaglikse roetine wil wegkom, is daar min plekke wat die diep Karoo klop. Hierdie jaar het my jaarlikse wintervakansie my na die Rogge Cloof Privaat Natuurreservaat op die Roggeveldplato buite Sutherland geneem. My Collie-mengsel, Emilie, was saam vir die ervaring.
Rogge Cloof is geleë langs die R354, 15 km voor Sutherland – as jy van Mattjiesfontein af kom . Die Eko-dorpie, waar die verblyf is, is nog 12 km van die pad af, gesentreer rondom die oorspronklike 1700’s plaashuis. Vir diegene met ‘n landbou-ingesteldheid, is dit duidelik waarom die eerste eienaar van die eiendom, Joachim Scholtz, hierdie plek gekies het. Die Cloof is dalk kouer as die hoër vlaktes, maar dit bied skuiling teen die ysige winde, baie water en bewerkbare grond. (Wynliefhebbers moet ‘n nota maak dat Rogge Cloof uitstekende Chardonnay, Syrah en Pinot Noir produseer van SA se hoogste en koudste wingerde.)
Om die aarde liggies aan te raak, word ernstig opgeneem by Rogge Cloof. Van eenvoudige herwinning tot staatmaak op sonkrag, die gebruik van gesmelte plastiekbottels om dakke te isoleer, ‘n florerende kweekhuis en die herwinning of hergebruik van wat ook al op die eiendom gevind word, is omgewingsbewaring boaan die agenda.
‘n Verskeidenheid akkommodasie-opsies is beskikbaar; van die volledig toegeruste luukse Orion Suites tot verskeie selfsorg-opsies, insluitend die Wolskuur Kothuis (die oorspronklike skeerstal). Maaltye word in die Rittersaal bedien en is ook beskikbaar vir selfsorggaste indien vooraf bespreek.
Gaste kan kies uit talle aktiwiteite – of eenvoudig so min doen as wat hulle wil! Wildritte, begeleide jagluiperdopsporing, staptogte op ‘n dormante vulkaan (Salpeterkop), geskiedenisritte na Anglo-Boereoorlog-ruïnes, vetwielfietsry (of bring jou eie fiets), sterrekyk/astrofotografie en ‘n besoek aan ‘n fossielveld uit die Permiese Tydperk is maar net ‘n paar van die opsies. Terwyl jy in die omgewing is, moet jy ook die tyd neem om die SA Astronomiese Sterrewag aan die ander kant van Sutherland te besoek. Toere is gratis, maar moet vooraf bespreek word.
Emilie en ek het ‘n dapper poging aangewend om soveel as moontlik van die omliggende vlaktes en rante te verken. Of dit nou op ysige oggende was – met Joachim, die reservaat se jong goue retriever wat die ys op die plaasdam verpletter – of later, terwyl ons in die winterson bak, elke draai bied iets vir die siel. Helaas het ons nie daarby uitgekom om al die staptogte te doen wat ons beplan het nie en moes ons Joachim belowe dat ons sal terugkom om die res te doen!
Rogge Cloof Privaat Natuurreservaat is ‘n lid van Cape Country Routes South Africa; ‘n toonaangewende niewinsgewende bemarkingskollektief van eienaar-bestuurde akkommodasie- en aktiwiteitsondernemings. Lede sluit meer as 20 privaatbesitte hotelle, lodges en gastehuise in. Almal is geleë op skilderagtige en historiese roetes in die Wes-, Oos- en Noord-Kaap en sorgvuldig gekies vir hul karakter, sjarme en romanse. Uitstekende akkommodasie- en aktiwiteitsopsies is beskikbaar vir elke smaak en begroting.
Teks en Foto’s: Siegfried Schäfer (bykomende foto’s: Rogge Cloof /Di Brown)
