Die Stellenbosch Internasionale Kamermusiekfees (SICMF) is Afrika se voorste klassieke musiekfees wat hedendaagse musiek kombineer met ikoniese werke van die verlede. Die jaarlikse byeenkoms van die wêreld se beste musikante in Stellenbosch is ‘n geleentheid vir die SICMF Artistieke Direkteur, Nina Schumann, om sonder beperking te programmeer.
Vir diegene wat die geleentheid geniet om nuwe musiek op ‘n internasionale standaard te hoor, is die vooruitsigte om Widmann, Philip Glass en Oli Mustonen weer te hoor, asemrowend. Widmann, Glass en Mustonen is almal komponiste wie se werke reeds by Europa se top musiekfeeste uitgevoer is, en wie se musiek die afgelope paar jaar deur die SICMF na Suid-Afrika gebring is.
Vanjaar bied die SICMF nie minder nie as 11 Suid-Afrikaanse premières aan deur komponiste soos Pavel Karmanov, Ante Grgin en Fasil Say, wie se trio, Jump , ‘n wonderlike voorbeeld van kontemporêre impressionisme deur een van die mees eksentrieke konsertpianiskomponiste wat nog leef, uitgevoer sal word deur Daniel Rowland (viool), Maja Bogdanovic (tjello), Nina Schumann (klavier).
Vanjaar se opdrag is deur die jong bekroonde Suid-Afrikaanse komponis, Owen Dalton. Die wêreldpremière van Dalton se A Tough Tale sal gespeel word deur ‘n groot ensemble wat bestaan uit byna al die SICMF-fakulteitskunstenaars, ondersteun deur ‘n aantal top SICMF-studentedeelnemers. Xandi van Dijk sal die groep dirigeer terwyl Tereska Muishond haar poësie sowel as poësie deur Antjie Krog en Mongane Wally Serote wat in die komposisie geïntegreer is, voorlees.
Geen van hierdie nuwe musiek sou die status geniet wat dit het as dit nie was vir die konteks van die sublieme en briljante standaardrepertorium wat dit ondersteun nie. Nina Shumann het weereens goeie werk gedoen om die oue en die nuwe te integreer. Vir diegene wat kom vir hul dosis lewendige klassieke musiek, is Mozart se Kwintet vir Klavier en Blaasinstrumente gespeel deur Titus Underwood (hobo), YaoGuang Zhai (klarinet), Julia Harguindey (fagot), José Garcia Gutiérrez (Franse horing) en Pieter Grobler (klavier) net die ding. Ander werke uit die standaardrepertoirestal sluit in Cesar Franck se klavierkwintet, Brahms Op 115 Kwintet in ‘n spesiale verwerking net vir strykinstrumente, en Mendelssohn se bruisende concerto vir viool en klavier om maar net ‘n paar te noem.
Die SICMF wat van 3 tot 12 Julie duur, word afgesluit met ‘n naweek van orkeskonserte met die studentedeelnemers saam met die konsertsoliste David Cohen (tjello), Miclen LaiPang (viool), Emanuil Ivanov (klavier) en Siwoo Kim (viool). Die Fees-Simfonieorkes – die hoofwerk op hul program is Mahler se eerste simfonie – sal deur Michael Repper gedirigeer word. Die Fees-Konsertorkes, wat werke van Tsjaikofski, Bruch en Bizet speel, sal deur Karin Hendrickson gedirigeer word. En die nuutgestigte Fees-Simfoniese Blaasorkes onder leiding van Liam Burden sal werke van Phillip Sparke, Eric Whitacre, Paul Heart, Lize Briel en Martin Elerby speel .
Kaartjies is nou beskikbaar by Webtickets.
Besoek gerus www.sicmf.co.za vir die volledige program en meer inligting.
Teks: Redaksionele Kantoor | Foto: SICMF
